കനകക്കുന്നിലെ ഓണം ടൂറിസം വാരാഘോഷത്തില്‍ ശ്രദ്ധേയമായി ശ്രീകൃഷ്ണ വിശ്വരൂപത്തിന് ജീവന്‍ പകരുന്ന രംഗോലി

ഓണാഘോഷം സംഘടിപ്പിക്കുന്നത് തനത് കലകളെയും കലാകാരന്‍മാരെയും ചേര്‍ത്തുപിടിച്ചുകൊണ്ട്: മന്ത്രി പി.സി വിഷ്ണുനാഥ്

Trivandrum / August 25, 2026

തിരുവനന്തപുരം: ടൂറിസം വകുപ്പ് സംഘടിപ്പിച്ച ഓണം ടൂറിസം വാരാഘോഷത്തിന്‍റെ ഭാഗമായി കനകക്കുന്നില്‍ തയ്യാറാക്കിയ ശ്രീകൃഷ്ണന്‍റെ വിശ്വരൂപം രംഗോലി ശ്രദ്ധേയമാകുന്നു. ഭഗവദ്ഗീതയില്‍ അര്‍ജുനന് ദര്‍ശനം നല്‍കിയ ശ്രീകൃഷ്ണന്‍റെ വിശ്വരൂപം കൃത്യതയോടെയും വര്‍ണപ്പൊലിമയോടെയുമാണ് രംഗോലി രൂപത്തില്‍ ഒരുക്കിയിട്ടുള്ളത്. നിരവധി ആളുകളാണ് ഈ രംഗോലി കലാവിഷ്കാരം കാണാനും ചിത്രങ്ങള്‍ പകര്‍ത്താനുമായി കനകക്കുന്നില്‍ എത്തുന്നത്.

കേരള ഇന്‍സ്റ്റിറ്റ്യൂട്ട് ഓഫ് ടൂറിസം ആന്‍ഡ് ട്രാവല്‍ സ്റ്റഡീസിലെ (കിറ്റ്സ്) ലൈബ്രേറിയന്‍ നിരുപ സതീഷാണ് ശ്രദ്ധേയമായ ഈ കലാസൃഷ്ടി സൃഷ്ടിച്ചിരിക്കുന്നത്. മൂന്ന് പതിറ്റാണ്ടോളമായി അവര്‍ പരമ്പരാഗത രംഗോലി കലാ രംഗത്തുണ്ട്.

 
പരമ്പരാഗത കലകള്‍ക്ക് പ്രാധാന്യം നല്‍കിക്കൊണ്ടാണ് ഇത്തവണ ഓണം ടൂറിസം വാരാഘോഷം സംഘടിപ്പിച്ചിട്ടുള്ളതെന്ന് ടൂറിസം സാംസ്കാരിക മന്ത്രി പി.സി വിഷ്ണുനാഥ് പറഞ്ഞു. തിരുവനന്തപുരം നഗരത്തിലെ ഓണാഘോഷത്തിന്‍റെ പ്രധാന വേദിയായ കനകക്കുന്നില്‍ എത്തുന്നവരെ ആകര്‍ഷിക്കുന്നതിനായി നിരവധി പരിപാടികളാണ് ഒരുക്കിയിട്ടുള്ളത്. ശ്രീകൃഷ്ണ വിശ്വരൂപം രംഗോലിയില്‍ ഒരുക്കിയ കൂറ്റന്‍ കലാരൂപം അത്തരത്തില്‍ ഒന്നാണ്. തനത് കലകളെ സംരക്ഷിക്കുകയും കലാകാരന്‍മാരെ ചേര്‍ത്തുപിടിക്കുകയും ചെയ്തുകൊണ്ടാണ് സര്‍ക്കാര്‍ ഓണാഘോഷം സംഘടിപ്പിച്ചിട്ടുള്ളതെന്നും മന്ത്രി കൂട്ടിച്ചേര്‍ത്തു.

കളര്‍പൊടി, അരിപ്പൊടി, പ്രകൃതിദത്ത വസ്തുക്കള്‍ എന്നിവ ഉപയോഗിച്ചാണ് രംഗോലി കലാവിഷ്കാരത്തിന്‍റെ നിര്‍മ്മാണം. വലിയ രൂപത്തിലുള്ള ഈ സൃഷ്ടി പൂര്‍ത്തിയാക്കാന്‍ നിരുപ നാല് ദിവസമെടുത്തു. മുഖ സവിശേഷതകളും ചിത്രത്തിന്‍റെ സങ്കീര്‍ണ്ണമായ വിശദാംശങ്ങളും സൃഷ്ടിക്കാന്‍ ഒന്നിലധികം നിറങ്ങള്‍ ശ്രദ്ധാപൂര്‍വ്വം സംയോജിപ്പിച്ചു. വിശ്വരൂപം ഭക്തി, പാരമ്പര്യം, ദൃശ്യകല എന്നിവയെ ഒരുമിച്ച് കൊണ്ടുവരുന്ന ഈ സൃഷ്ടി കനകക്കുന്നിലെ ഓണാഘോഷത്തിന് സവിശേഷമായ ആകര്‍ഷണം നല്‍കുന്നു.

കലാപാരമ്പര്യമുള്ള കുടുംബ പശ്ചാത്തലമാണ് നിരുപയുടേത്. നിരുപയുടെ അമ്മ വീട്ടുമുറ്റത്ത് കോലം വരയ്ക്കുകയും പൊങ്കല്‍ സമയത്ത് ഇത്തരം ചിത്രങ്ങള്‍ ഒരുക്കുകയും ചെയ്യാറുണ്ടായിരുന്നു. അമ്മയില്‍ നിന്ന് പ്രചോദനം ഉള്‍ക്കൊണ്ട് സ്വന്തം സൃഷ്ടികളിലൂടെ നിരുപ ആ പാരമ്പര്യം കൂടുതല്‍ വികസിപ്പിച്ചു. പരമ്പരാഗത രംഗോലി സാങ്കേതങ്ങളും വിശദമായ ഛായാചിത്രങ്ങളും സംയോജിപ്പിക്കുന്ന സൃഷ്ടികളാണ് നിരുപ നടത്തുന്നത്. പ്രധാനമായും ദൈവ, ദേവതാ രൂപങ്ങളെയാണ് അവര്‍ രംഗോലിയില്‍ ചിത്രീകരിക്കുന്നത്.

Photo Gallery

+

Content