ആര്‍ജിസിബി എംഎസ് സി ബയോടെക്നോളജി കോഴ്സിന് അപേക്ഷ ക്ഷണിച്ചു

Trivandrum / June 16, 2026

തിരുവനന്തപുരം: കേന്ദ്ര ശാസ്ത്ര സാങ്കേതിക വകുപ്പിന്‍റെ കീഴില്‍ പ്രവര്‍ത്തിക്കുന്ന സ്ഥാപനമായ രാജീവ് ഗാന്ധി സെന്‍റര്‍ ഫോര്‍ ബയോടെക്നോളജി (ബ്രിക്-ആര്‍ജിസിബി) 2026-28 അധ്യയന വര്‍ഷത്തേക്കുള്ള എംഎസ് സി ബയോടെക്നോളജി കോഴ്സിലേക്ക് പ്രവേശനത്തിന് അപേക്ഷ ക്ഷണിച്ചു. GAT-B യോഗ്യതയുള്ള വിദ്യാര്‍ത്ഥികളാണ് അപേക്ഷിക്കേണ്ടത്.

ഡിസീസ് ബയോളജി, ജനറ്റിക് എഞ്ചിനീയറിംഗ് എന്നീ സ്പെഷ്യലൈസേഷനുകള്‍ ഉണ്ടായിരിക്കും. നാല് സെമസ്റ്ററുകളിലായി രണ്ട് വര്‍ഷമാണ് കോഴ്സ് കാലാവധി. രണ്ട് കോഴ്സുകളിലും പത്ത് വീതം സീറ്റുകളാണുള്ളത്.

60 ശതമാനം മാര്‍ക്ക്/തത്തുല്യ ഗ്രേഡില്‍ കുറയാതെ യുജിസി മാനദണ്ഡപ്രകാരമുള്ള ലൈഫ് സയന്‍സ് അല്ലെങ്കില്‍ മെഡിസിനിലെ ഏതെങ്കിലും ശാഖയില്‍ ബാച്ചിലേഴ്സ് ബിരുദവും GAT-B സ്കോറുമുള്ളവര്‍ക്ക് അപേക്ഷിക്കാം. എസ് സി, എസ് ടി, ഒബിസി (നോണ്‍-ക്രീമിലെയര്‍), വികലാംഗ വിഭാഗങ്ങളില്‍ നിന്നുള്ള ഉദ്യോഗാര്‍ത്ഥികള്‍ക്ക് മൊത്തം മാര്‍ക്കില്‍ അഞ്ച് ശതമാനം ഇളവ് ലഭിക്കും.

കോഴ്സില്‍ പ്രവേശനം നേടുന്ന വിദ്യാര്‍ത്ഥികള്‍ക്ക് ആദ്യ വര്‍ഷം 6000 രൂപയും രണ്ടാം വര്‍ഷം 8000 രൂപയും പ്രതിമാസം സ്റ്റൈപ്പന്‍ഡ് ലഭിക്കും. ആര്‍ജിസിബി കാമ്പസില്‍ ഹോസ്റ്റല്‍ താമസ സൗകര്യം ലഭ്യമാണ്.

യോഗ്യതാ ബിരുദ കോഴ്സിന്‍റെ അവസാന വര്‍ഷ വിദ്യാര്‍ത്ഥികള്‍ക്ക് പ്രവേശന സമയത്ത് അവരുടെ ബിരുദ പ്രോഗ്രാമില്‍ ആവശ്യമായ മാര്‍ക്ക് നേടിയതിന്‍റെ തെളിവ് ഹാജരാക്കി അപേക്ഷിക്കാന്‍ അര്‍ഹതയുണ്ട്.

ഓരോ വിഭാഗത്തിനും നിശ്ചയിച്ചിട്ടുള്ള GAT-B കട്ട്-ഓഫ് റാങ്ക്/സ്കോര്‍ അടിസ്ഥാനമാക്കിയായിരിക്കും വിദ്യാര്‍ത്ഥികളുടെ അന്തിമ തിരഞ്ഞെടുപ്പ് നടത്തുക.

ഓണ്‍ലൈന്‍ അപേക്ഷ സമര്‍പ്പിക്കാനും യോഗ്യതയെക്കുറിച്ചുള്ള മറ്റ് വിശദാംശങ്ങള്‍ക്കും സന്ദര്‍ശിക്കുക: https://rgcb.res.in/MSc2026/

അപേക്ഷ സമര്‍പ്പിക്കാനുള്ള അവസാന തീയതി 2026 ജൂണ്‍ 30.