കായംകുളത്ത് കരുത്തുകാട്ടി കാരിച്ചാല്‍ ചാമ്പ്യന്‍ പട്ടത്തിലേക്ക് പള്ളാത്തുരുത്തിക്ക് ഇനി ഒരു പടി കൂടി മാത്രം
Kayamkulam / December 14, 2024
കായംകുളം: കേരള ടൂറിസം സംഘടിപ്പിക്കുന്ന ചുണ്ടന്‍ വള്ളങ്ങളുടെ ലീഗ് മത്സരമായ ചാമ്പ്യന്‍സ് ബോട്ട് ലീഗിന്‍റെ കായംകുളത്ത് നടന്ന അഞ്ചാം മത്സരത്തില്‍ പള്ളാത്തുരുത്തി ബോട്ട് ക്ലബ് തുഴഞ്ഞ കാരിച്ചാല്‍ ചുണ്ടന്‍ വില്ലേജ് ബോട്ട് ക്ലബ് വിജയിച്ചു. വില്ലേജ് ബോട്ട് ക്ലബ് തുഴഞ്ഞ വീയപുരം രണ്ടും നിരണം ബോട്ട് ക്ലബ് തുഴഞ്ഞ നിരണം ചുണ്ടന്‍ മൂന്നാമതും ഫിനിഷ് ചെയ്തു. കാരിച്ചാല്‍ (5:13:84 മിനിറ്റ്), വീയപുരം(5:18:87 മിനിറ്റ്), നിരണം(5:19:44 മിനിറ്റ്) എന്നിങ്ങനെയാണ് ഫൈനലിലെ ഫിനിഷ് സമയം.
അവിശ്വസനീയം എന്നു മാത്രമാണ് കായംകുളത്തെ സിബിഎല്‍ മത്സരത്തെ വിശേഷിപ്പിക്കാനാകൂ. ഫൈനലില്‍ കായംകുളത്തെ നെട്ടായത്തിന്‍റെ പകുതിയിലധികവും പത്ത് തുഴപ്പാടുകള്‍ക്ക് പിന്നിട്ടു നിന്ന പിബിസി കാരിച്ചാല്‍ കണ്ണഞ്ചിപ്പിക്കുന്ന കുതിപ്പ് നടത്തിയാണ് ഒന്നാമതെത്തിയത്. പത്ത് തുഴപ്പാടുകള്‍ മറികടന്ന് അര വള്ളപ്പാട് വ്യത്യാസത്തില്‍ മറ്റുള്ളവരെ തോല്‍പ്പിച്ചത് സിബിഎല്ലിന്‍റെ ചരിത്രത്തിലെ ഏറ്റവും മികച്ച ഫിനിഷായിരുന്നു.
സിബിഎല്ലില്‍ ആദ്യമായി പയറ്റുന്ന നിരണം ചുണ്ടന്‍ ഇക്കുറി ഒന്നാമതെത്തുമെന്നാണ് മത്സരത്തിന്‍റെ തുടക്കത്തില്‍ കരുതിയിരുന്നത്. എന്നാല്‍ തുടക്കത്തിലെ കുതിപ്പ് ഫിനിഷ് ചെയ്യുന്നതില്‍ കാണിക്കാന്‍ അവര്‍ക്കായില്ല.
പിബിസി കാരിച്ചാല്‍ പോയിന്‍റ് പട്ടികയില്‍ ഒന്നാമതാണ്. വിബിസി വീയപുരം രണ്ടാമതും നിരണം ചുണ്ടന്‍ പട്ടികയില്‍ മൂന്നാമതെത്തി. ഇനി ഡിസംബര്‍ 21 ന് കൊല്ലത്തെ പ്രസിഡന്‍റ്സ് ട്രോഫി ഗ്രാന്‍റ് ഫിനാലെ മത്സരത്തോടെ ഇക്കൊല്ലത്തെ സിബിഎല്ലിന് സമാപനമാകും.
തലവടി(യുബിസി കൈനകരി) നാല്, നടുഭാഗം(കുമരകം ടൗണ്‍ ബോട്ട് ക്ലബ്)അഞ്ച് ചമ്പക്കുളം(പുന്നമട ബോട്ട് ക്ലബ്)ആറ്, മേല്‍പ്പാടം(കുമരകം ബോട്ട് ക്ലബ്) ഏഴ്, പായിപ്പാട്(ആലപ്പുഴ ടൗണ്‍ ബോട്ട് ക്ലബ്) എട്ട്, ആയാപറമ്പ് വലിയദിവാന്‍ജി (ചങ്ങനാശേരി ബോട്ട് ക്ലബ്) ഒമ്പത് എന്നിങ്ങനെയാണ് കായംകുളത്തെ അവസാനവട്ട സ്ഥാനങ്ങള്‍.
കായംകുളം എംഎല്‍എ യു പ്രതിഭ, കായംകുളം നഗരസഭ അധ്യക്ഷ പി ശശികല, തദ്ദേശ സ്വയംഭരണ സ്ഥാപനങ്ങളിലെ പ്രതിനിധികള്‍, ടൂറിസം വകുപ്പ് ഉദ്യോഗസ്ഥര്‍, സിബിഎല്‍ ഭരണസമിതി അംഗങ്ങള്‍ തുടങ്ങിയവര്‍ സംബന്ധിച്ചു.
ആകെ 3.20 കോടി രൂപയാണ് ആറ് മത്സരങ്ങളിലുമായി നല്‍കുന്ന സമ്മാനത്തുക. ഓരോ ലീഗ് മത്സരങ്ങളിലും ഒന്നും രണ്ടും മൂന്നും സ്ഥാനങ്ങളിലെത്തുന്ന ടീമിന് യഥാക്രമം 5 ലക്ഷം, 3 ലക്ഷം, 1 ലക്ഷം രൂപ വീതം ലഭിക്കും. സിബിഎല്ലിന്‍റെ ആറ് ലീഗ് മത്സരങ്ങളുടെയും പോയിന്‍റുകളുടെ അടിസ്ഥാനത്തില്‍ ഒന്നാം സ്ഥാനത്തുള്ള ടീമിന് 25 ലക്ഷവും രണ്ടും മൂന്നും സ്ഥാനങ്ങളിലുള്ളവര്‍ക്ക് യഥാക്രമം 15, 10 ലക്ഷം രൂപ വീതവും ലഭിക്കും.
ഇതിനു പുറമെ മത്സരങ്ങളില്‍ പങ്കെടുക്കുന്ന എല്ലാ ടീമുകള്‍ക്കും ഓരോ മത്സരത്തിനും മൂന്ന് ലക്ഷം രൂപ വീതവും ലഭിക്കും. ചുണ്ടന്‍വള്ളം ഉടമകള്‍ക്ക് ഓരോ മത്സരത്തിനും ഒരു ലക്ഷം രൂപ വീതം ബോണസും നല്‍കും.
