റബര്‍ ഉത്പന്നങ്ങളിലെ പുതിയ താരമായി ജിം മാറ്റ്
റബര്‍ ഉത്പന്നങ്ങളിലെ പുതിയ താരമായി ജിം മാറ്റ്
Kochi / June 17, 2022
കൊച്ചി: റബര്‍ ഉത്പന്നങ്ങളിലെ പുതിയ താരോദയമാണ് സംസ്ഥാന വ്യവസായ-വാണിജ്യ വകുപ്പ് സംഘടിപ്പിക്കുന്ന പ്രദര്‍ശനമേളയായ വ്യാപാര്‍ 2022ല്‍ പ്രദര്‍ശിപ്പിച്ചിരിക്കുന്ന വ്യായാമത്തിനുള്ള ജിം മാറ്റ്. റബര്‍ പാല്‍ ഉത്പാദനത്തില്‍ മുമ്പിട്ട് നില്‍ക്കുന്നുണ്ടെങ്കിലും ഈ മേഖലയില്‍ വ്യവസായിക വളര്‍ച്ചയില്ലെന്ന പരാതിയ്ക്ക് പരിഹാരമാണ് വൈവിദ്ധ്യമാര്‍ന്ന ഉത്പന്നങ്ങള്‍.
പലവിധ ഉപയോഗത്തിനുള്ള റബര്‍ മാറ്റുകള്‍ വിപണിയിലുണ്ടെങ്കിലും ആരോഗ്യജീവിതത്തിനുതകുന്ന ഉത്പന്നങ്ങളാണ് കേരളത്തിലെ റബര്‍ വ്യവസായത്തിലെ പുതിയ താരം. ഗാര്‍ഹികാവശ്യത്തിനും വാണിജ്യാവശ്യങ്ങള്‍ക്കുമുള്ള യോഗ-ജിം മാറ്റുകളാണ് വിപണിയിലേക്കെത്തിയിരിക്കുന്നത്.
നിലവില്‍ ഓണ്‍ലൈനായും അല്ലാതെയും ലഭിക്കുന്ന റബര്‍ മാറ്റുകള്‍ക്ക് ഉയര്‍ന്ന വിലയാണ് ഈടാക്കുന്നത്. എന്നാല്‍ മിതമായ വിലയും മികച്ച ഉത്പന്നവുമാണ് കേരളത്തില്‍ നിന്നുള്ള സംരംഭകര്‍ പുറത്തിറക്കുന്നതെന്ന് കോട്ടയത്തു നിന്നുള്ള സംരംഭകന്‍ തോബിയാസ് തോമസ് കുളങ്ങര പറഞ്ഞു.
ഒരു മീറ്ററും അരമീറ്ററും ചതുരമായ നാല് ഭാഗങ്ങളായാണ് മാറ്റുകള്‍ ലഭിക്കുന്നത്. വളരെയെളുപ്പത്തില്‍ ഘടിപ്പിക്കാവുന്ന ഇന്‍റര്‍ലോക്കുള്ളതിനാല്‍ തെന്നിപ്പോകില്ല. ചുരുട്ടി വയ്ക്കാവുന്നരീതിയിലുള്ള മാറ്റുകളും ഉത്പാദിപ്പിക്കുന്നുണ്ട്. ഫ്ളൂറസെന്‍റ് പെയിന്‍റ് ഡിസൈന്‍ ഉള്ളതിനാല്‍ രാത്രിയിലും ഇത് തിളങ്ങി നില്‍ക്കും. 6, 8, 10 മില്ലീമീറ്റര്‍ കനത്തിലുള്ള ഈ മാറ്റുകള്‍ വിവിധ നിറങ്ങളിലും ലഭ്യമാണ്.
ഓണ്‍ലൈനായി നിരവധി അന്വേഷണങ്ങളാണ് ജിം മാറ്റിന് ലഭിക്കുന്നതെന്നും തോബിയാസ് പറഞ്ഞു. ഇലാസ്റ്റികിനാവശ്യമായ റബര്‍ നൂലുകളും കേരളത്തില്‍ ഉത്പാദിപ്പിക്കുന്നുണ്ട്. വിവിധ കനത്തില്‍ ലഭിക്കുന്ന ഇവയ്ക്ക് ഇന്ത്യയ്ക്ക് വെളിയിലും നിരവധി ആവശ്യക്കാരുണ്ട്.
അന്താരാഷ്ട്ര നിലവാരത്തിലുള്ള ഉത്പന്നങ്ങള്‍ നിര്‍മ്മിക്കാന്‍ കേരളത്തിലെ സംരംഭകര്‍ മുന്നിട്ടിറങ്ങുന്നത് പ്രശംസനീയമാണെന്ന് വ്യവസായ വാണിജ്യ വകുപ്പ് ഡയറക്ടര്‍ എസ്. ഹരികിഷോര്‍ പറഞ്ഞു. ഇന്ത്യയിലും വിദേശത്തും ഒരു പോലെ ആവശ്യക്കാരുള്ള ഉത്പന്നങ്ങള്‍ക്ക് നഷ്ടസാധ്യത കുറവായിരിക്കുമെന്നും അദ്ദേഹം പറഞ്ഞു. ഗാര്‍ഹികോപയോഗ ഉത്പന്നങ്ങള്‍ക്ക് വലിയ വിപണിയുണ്ടെന്ന് കെബിപ്പ് സി.ഇ.ഒ സൂരജ് എസ് പറഞ്ഞു. ഓണ്‍ലൈന്‍ വിപണനസാധ്യതകളുള്‍പ്പെടെ സംരംഭകര്‍ ഉപയോഗപ്പെടുത്തണമെന്നും അദ്ദേഹം പറഞ്ഞു.
കൊച്ചി ജവഹര്‍ലാര്‍ നെഹ്രു രാജ്യാന്തര സ്റ്റേഡിയം ഗ്രൗണ്ടില്‍ സംഘടിപ്പിക്കുന്ന ത്രിദിന ബിടുബിയില്‍ പതിനായിരത്തോളം ബിസിനസ് കൂടിക്കാഴ്ചകള്‍ നടക്കും. രാജ്യത്തിന്‍റെ വിവിധ ഭാഗങ്ങളില്‍ നിന്നുള്ള അഞ്ഞൂറോളം ബയര്‍മാരും മൂന്നൂറിലധികം എംഎസ്എംഇ പ്രമോട്ടര്‍മാരും പങ്കെടുക്കുന്നുണ്ട്.
Photo Gallery
