കേരളത്തിലെ ആദ്യ സര്‍ക്കാരിതര കാമ്പസ് വ്യവസായപാര്‍ക്ക് ആരംഭിച്ച് ജെന്‍ റോബോട്ടിക്സ്
Kochi / May 2, 2024
കൊച്ചി:നിരവധി അന്താരാഷ്ട്ര അംഗീകാരങ്ങള്‍ നേടിയ കേരളത്തില്‍ നിന്നുള്ള റോബോട്ടിക്സ് സ്റ്റാര്‍ട്ടപ്പായ ജെന്‍ റോബോട്ടിക്സ് സംസ്ഥാനത്തെ ആദ്യ സര്‍ക്കാരിതര കാമ്പസ് വ്യവസായപാര്‍ക്ക് ആരംഭിച്ചു. മുവാറ്റുപുഴ ഇലാഹിയ കോളേജ് ഓഫ് എന്‍ജിനീയറിംഗ് ആന്‍ഡ് ടെക്നോളജിയിലാണ്(ഐസിഇടി) പാര്‍ക്ക് ആരംഭിച്ചത്. സംസ്ഥാനസര്‍ക്കാരിന്‍റെ പുതിയ പദ്ധതിയായ കാമ്പസുകളില്‍ വ്യവസായപാര്‍ക്കെന്ന ആശയത്തിന്‍റെ ഭാഗമായാണ് പാര്‍ക്ക് ആരംഭിച്ചത്.
റോബോട്ടിക്സ് സാങ്കേതികവിദ്യയില്‍ നിര്‍മ്മിത ബുദ്ധി കൂടുതല്‍ ഫലവത്തായി സമന്വയിപ്പിക്കാനുള്ള ഗവേഷണങ്ങളാകും അത്യാധുനിക വ്യവസായപാര്‍ക്കില്‍ ഉണ്ടാവുന്നത്. മൂന്ന് കോടി രൂപ നിക്ഷേപത്തിലാണ് പാര്‍ക്ക് തുടങ്ങുന്നത്.
ഐസിഇടിയില്‍ നടന്ന ചടങ്ങില്‍ കേരള സ്റ്റാര്‍ട്ടപ്പ് മിഷന്‍ സിഒഒ ടോം തോമസ് വ്യവസായ പാര്‍ക്കിന്‍റെ ഉദ്ഘാടനം നിര്‍വഹിച്ചു. ഐസിഇടി ഡയറക്ടര്‍ അബ്ദുള്‍ സലാം, മാനേജര്‍ വി യു സിദ്ദിഖ്, ചെയര്‍മാന്‍ പി എച് മുനീര്‍, ജെന്‍ റോബോട്ടിക്സിന്‍റെ ഡയറക്ടറും സഹസ്ഥാപകനുമായ നിഖില്‍ എന്‍ പി എന്നിവരും പരിപാടിയില്‍ പങ്കെടുത്തു.
മാലിന്യക്കുഴലുകള്‍ വൃത്തിയാക്കാനുള്ള ബാന്‍ഡികൂട്ട് എന്ന റോബോട്ടിലൂടെ ലോകപ്രശസ്തമായ കമ്പനിയാണ് ജെന്‍ റോബോട്ടിക്സ്. രാജ്യത്തെ ഏറ്റവും മികച്ച നിര്‍മ്മിത ബുദ്ധി സ്റ്റാര്‍ട്ടപ്പുകളില്‍ ആദ്യ നാല് സ്ഥാനങ്ങളില്‍ ഇടം പിടിച്ച കമ്പനിയുമാണിത്. ഹ്യൂമനോയിഡ്, സെമി ഹ്യൂമനോയിഡ് വിഭാഗത്തില്‍പ്പെടുന്ന റോബോട്ടുകളുടെ വികസനം, നൂതനാശയങ്ങളുടെ വാണിജ്യവത്കരണം, നിര്‍മ്മിത ബുദ്ധിയെ സമന്വയിപ്പിക്കല്‍ എന്നിവയാണ് ജെന്‍ റോബോട്ടിക്സ് ഉദ്ദേശിക്കുന്നത്.
സംസ്ഥാനത്തെ ആദ്യ ഹ്യൂമനോയിഡ് ഗവേഷണ സ്ഥാപനമാകും ഇത്. ഇന്‍റേണ്‍ഷിപ്പുകള്‍, ഗവേഷണം, ജോലി തുടങ്ങിയവ വിദ്യാര്‍ത്ഥികള്‍ക്കും പുറത്തുള്ളവര്‍ക്കും ഈ വ്യവസായപാര്‍ക്കിലൂടെ നല്‍കാനുദ്ദേശിക്കുന്നു.
സംസ്ഥാനത്തെ കോളേജുകളില്‍ സാങ്കേതിക ഗവേഷണ കേന്ദ്രങ്ങള്‍ സ്ഥാപിക്കുന്നതിലേക്കുള്ള ആദ്യ കാല്‍വയ്പാണ് ഐസിഇടിയുമായുള്ള ഈ സംയുക്ത സംരംഭമെന്ന് നിഖില്‍ എന്‍ പി പറഞ്ഞു. അക്കാദമിക് ഗവേഷണങ്ങള്‍ ഹ്യൂമനോയിഡ് റോബോട്ടിക്സിലേക്ക് ജെന്‍ റോബോട്ടിക്സിന്‍റെ മേല്‍നോട്ടത്തില്‍ നടത്തുകയാണ് ചെയ്യുന്നത്.
കൃത്യമായ ഗവേഷണത്തിലൂടെ റോബോട്ടിക്സിനെയും നിര്‍മ്മിതബുദ്ധിയെയും സമന്വയിപ്പിക്കാനായുള്ള വ്യവസായ പാര്‍ക്ക് രാജ്യത്താദ്യമായാണ് സ്ഥാപിക്കുന്നതെന്ന് നിഖില്‍ ചൂണ്ടിക്കാട്ടി. മനുഷ്യന്‍ നേരിടുന്ന പല പ്രശ്നങ്ങള്‍ക്കും പരിഹാരം കണ്ടെത്തുന്നതിനും റോബോട്ടിക്സിലെ അനന്ത സാധ്യതകള്‍ ഉപയോഗപ്പെടുത്തുന്നതിനും വേണ്ടിയാണ് ഈ വ്യവസായ പാര്‍ക്ക് പ്രവര്‍ത്തിക്കുന്നതെന്നും അദ്ദേഹം പറഞ്ഞു.
തന്‍റെ പൂര്‍വവിദ്യാര്‍ത്ഥികള്‍ സമൂഹ നന്മയ്ക്കായുള്ള പ്രവര്‍ത്തനങ്ങള്‍ നടത്തുകയും അതിന്‍റെ വ്യവസായ-വാണിജ്യ സാധ്യതകള്‍ ഉപയോഗപ്പെടുത്തുകയും കാണുമ്പോള്‍ ഏറെ അഭിമാനം തോന്നുന്നുവെന്ന് ഐസിഇടി പ്രിന്‍സിപ്പല്‍ ഡോ. കെ എ നവാസ് പറഞ്ഞു. പാര്‍ശ്വവത്കരിപ്പെട്ടവരുടെ ഉന്നമനത്തിനായി ആധുനികസാങ്കേതികവിദ്യയെ ഉപയോഗപ്പെടുത്തുകയാണ് ഇവര്‍ ചെയ്യുന്നത്. സമഗ്രമായ വിജ്ഞാന സമ്പാദനത്തിനുള്ള ഐസിഇടിയുടെ പ്രതിബദ്ധത ഉയര്‍ത്തിപ്പിടിക്കുന്നതിനോടൊപ്പം വിദ്യാര്‍ത്ഥികളെ യഥാര്‍ഥ ലോകത്തിന്‍റെ വെല്ലുവിളികള്‍ നേരിടാന്‍ സജ്ജരാക്കുകയും ചെയ്യും. പൊതു സമൂഹം, വിദ്യാര്‍ഥികള്‍, അധ്യാപകര്‍ എന്നിവരുടെ ഗുണത്തിനായി നൂതനത്വവും മികവും ശരിയായ രീതിയില്‍ ഉപയോഗിക്കാന്‍ ഈ സംയുക്ത സംരംഭത്തിന് കഴിയുമെന്നും അദ്ദേഹം പറഞ്ഞു.
നിര്‍മ്മിത ബുദ്ധി റോബോട്ടിക്സ് മേഖലയില്‍ സ്വപ്നതുല്യമായ നേട്ടങ്ങളുമായി മുന്നേറുന്ന ജെന്‍ റോബോട്ടിക്സ് സംസ്ഥാന സര്‍ക്കാരിന്‍റെ പ്രൈഡ് ഓഫ് കേരള പുരസ്ക്കാരം നേടിയിട്ടുണ്ട്. അത്യാധുനിക മെഡിക്കല്‍ റോബോട്ടിക്സ് മുതല്‍ ഓയില്‍ ടാങ്ക് വൃത്തിയാക്കല്‍ വരെയുള്ള ഓട്ടോമാറ്റിക് ടെക്നോളജി റോബോട്ടുകളും ഇവര്‍ വികസിപ്പിച്ചെടുത്തു കഴിഞ്ഞു.
Photo Gallery
