കടകളില്‍ ബില്ലടയ്ക്കാന്‍ ക്യൂ നില്‍ക്കേണ്ട, പുതിയ സൗജന്യ സോഫ്റ്റ്‌വെയറുമായി കെഎസ് യുഎം സ്റ്റാര്‍ട്ടപ്പ്
Kochi / March 18, 2024
കൊച്ചി: തിരക്കുള്ള സൂപ്പര്‍ മാര്‍ക്കറ്റുകളിലും തുണിക്കടകളിലും ഷോപ്പിംഗിനു പോകുന്നതിനേക്കാള്‍ ബുദ്ധിമുട്ടാണ് അവിടെ നിന്നും ബില്ലടച്ച് ഇറങ്ങി വരികയെന്നത്. ഈ പ്രതിസന്ധിയ്ക്ക് ശാശ്വത പരിഹാരം കാണുകയാണ് കേരള സ്റ്റാര്‍ട്ടപ്പ് മിഷനിലെ ഒറാവ്കോ പ്രൈവറ്റ് ലിമിറ്റഡ് എന്ന കമ്പനി.
സൂപ്പര്‍ മാര്‍ക്കറ്റുകളില്‍ ബില്ലടയ്ക്കാന്‍ അവസാനമില്ലാത്ത ക്യൂവില്‍ നിന്ന് മനസ് മടുത്താണ് ഗുരുവായൂര്‍ സ്വദേശി അനസ് സൈദ്മുഹമ്മദ് ഇത്തരമൊരു സോഫ്റ്റ്‌വെയറിനെക്കുറിച്ച് ചിന്തിക്കുന്നത്. തുടര്‍ന്ന് സുഹൃത്തായ ഒറ്റപ്പാലം സ്വദേശി രാജീവ് രാധാകൃഷ്ണനുമായി ചേര്‍ന്നാണ് ഒറാവ്കോ സെല്‍ഫ് ചെക്കൗട്ട് എന്ന സോഫ്റ്റ്‌വെയര്‍ നിര്‍മ്മിച്ചത്.
ഏതൊരു കടയുടമയ്ക്കും www.oravcoselfcheckout.com എന്ന വെബ്സൈറ്റിലൂടെ സൗജന്യമായി സ്വന്തം കട രജിസ്റ്റര്‍ ചെയ്ത് ആവശ്യമായ വിവരങ്ങള്‍ നല്‍കാം. അതു വഴി ലഭിക്കുന്ന ക്യു ആര്‍ കോഡ് പ്രിന്‍റ് ചെയ്ത് കടയില്‍ സ്ഥാപിക്കുക. ഉപഭോക്താക്കള്‍ സ്മാര്‍ട്ട്ഫോണിലുള്ള സ്കാനര്‍ ഉപയോഗിച്ച് ക്യുആര്‍ കോഡ് സ്കാന്‍ ചെയ്യുന്നതിലൂടെ ഓരോ ഉത്പന്നവും സ്വന്തം കാര്‍ട്ടിലേക്ക് ചേര്‍ക്കാം. ഷോപ്പിംഗ് അവസാനിച്ചാല്‍ യുപിഐ, കാര്‍ഡ്, നെറ്റ് ബാങ്കിംഗ് തുടങ്ങിയ സംവിധാനങ്ങളിലൂടെ ഓണ്‍ലൈനായി പണം അടച്ച് ക്യൂ നില്‍ക്കാതെ പുറത്തേക്കു പോകാമെന്നതാണ് ഇതിന്‍റെ മെച്ചം. ഈ സേവനം നേടുന്നതിന് ഉപഭോക്താവ് പ്രത്യേകം ആപ്പുകളൊന്നും ഇന്‍സ്റ്റാള്‍ ചെയ്യേണ്ട എന്നതും മേന്മയാണ്.
ഇനി ഏതെങ്കിലും സാധനം സ്കാന്‍ ചെയ്യാന്‍ മറന്നു പോവുകയോ അല്ലെങ്കില്‍ മന:പൂര്‍വ്വം പണമടക്കാതിരിക്കുകയോ ചെയ്താലും വഴിയുണ്ടെന്ന് അനസ് സൈദ്മുഹമ്മദ് പറഞ്ഞു. പുറത്ത് നില്‍ക്കുന്ന സെക്യൂരിറ്റിയുടെ വക മറ്റൊരു സ്കാനിംഗ് ഉണ്ട്. അത് ഉപഭോക്താവിന്‍റെ പക്കലുള്ള ബാസ്കറ്റോ ട്രോളിയോ ഒന്നടങ്കം സ്കാന്‍ ചെയ്യും. അതില്‍ പണമടച്ച ഉത്പന്നങ്ങളെല്ലാം അപ്രത്യക്ഷമാവുകയും പണമടയ്ക്കാത്തത് മാത്രം തെളിഞ്ഞു വരികയും ചെയ്യും. ദി വാനിഷിംഗ് മോഡല്‍ എന്നാണ് ഈ സംവിധാനത്തിന്‍റെ പേര്.
കളമശേരിയിലെ ടെക്നോളജി ഇനോവേഷന്‍ സോണില്‍ നടന്ന പരിപാടിയില്‍ കെഎസ് യുഎം അഡ്മിനിസ്ട്രേഷന്‍ ഓഫീസര്‍ മുഹമ്മദ് സഗീര്‍ ഉത്പന്നം പുറത്തിറക്കി. കെഎസ് യുഎം പ്രൊജക്ട് ഓഫീസര്‍ വിഗ്നേഷ് രാധാകൃഷ്ണന്‍ സംസാരിച്ചു.
പുതിയൊരു ഷോപ്പിംഗ് അനുഭവം കൂടിയാണ് ഒറാവ്കോ സെല്‍ഫ് ചെക്ക് ഔട്ട് നല്‍കുന്നതെന്ന് അനസ് പറഞ്ഞു. ഇന്ത്യയിലെ പ്രകാശനത്തിനു ശേഷം ഉടന്‍ തന്നെ ഗള്‍ഫ് രാജ്യങ്ങളിലും ഒറാവ്കോ സെല്‍ഫ് ചെക്കൗട്ട് പ്രവര്‍ത്തനം ആരംഭിക്കുമെന്നും അദ്ദേഹം കൂട്ടിച്ചേര്‍ത്തു.
Photo Gallery
